معدتش فاهم اعمل ايه

في البداية الكلام غالبا هيبقي كتير اوي بس انا حرفيا متكلمتش وخدت قرار اني افضفض هنا يمكن يكون حد مر بتجربتي ويقدر يقولي عمل فيها ايه🤔

دلوقتي انا عندي ٢٨ ابويا وامي ماتو من حوالي ١٢ سنة كده مثلا ومن ساعتها انا عايش لوحدي طبعا بعد خذلان الاهل والكلام الي ملوش عازة ده ما علينا يعني مشكلتي ان انا اصلا حتي لما اهلي كانو عايشين كانو منفصلين يعني انا ابويا اول مره اشوفه مثلا وانا كبير و واعي كان في ٢٠٠٧ او ٢٠٠٩ اظن مش فاكر بصراحة ف امي هي الي مربياني امي ديه كانت ست طيبة جدا يعني كانت مديرة مدرسة وكل حاجة لكن عمرها ما كانت تحب تاذي او تزعل حد ودايما تضحك في وش الناس وانا للاسف اتعلمت ده منها بما انها هي الي مربياني.. وهنا بقول للاسف لاني بعد ٢٨ عايش زيها كده اكتشفت انك لما تكون بشوش ومسالم وبتحترم اوي مشاعر الناس وتحاول تساعدهم بشتي الطرق كللل ده بيتفهم غلط والناس بتستغل ده فشخ ببساطة انت بتكون بالنسبة ليهم "زبون" وناس كتير هتقول صوابعك مش زي بعضها والكلام ده هقولك فكك بقي انا ٢٨ وشوفت الصوابع ديه كلها اه فيه ناس زيي كتير بس اكيد مش همشي بملقاط ادور عليهم ..

ومشكلتي الاكبر بقي اني من سن ٢٠ لحد ٢٦ سنة مثلا كنت منطلق فششخ وبسافر وبروح واجي والدنيا جميلة لكن من ٤ سنين كده بدات شغل فري لانس ةقاعد دايما في البيت تقريبا انعزلت عن الناس مدة سنتين ونصف منهم حجر الكورونا وطبعا اكتئاب بقي من كل الي مريت بيه طبعا انا محكيتش ٢٪ من المآسي الي شوفتها وده حرفيا يعني كفاية بس اني شوفت امي بتموت قدامي وبعديها ب سنة لما عيشت مع والدي وقربنا من بعض وبدات احبه مات قدامي بردو .. غير طبعا في الفترة ديه طوال ٦ سنين كنت مرتبط ببنت وبنحب بعض ومرت معايا بكل الخرا ده موت ابويا ثم موت امي ثم بعدها ابويا كان متجوز ومراته كانت طيبة جدا وبحبها وهي الي كانت متبقية جس وات ماتت بعديهم بسنتين

وجت بقي اخيرا وليس اخرا البنت الي كنا بنحب بعض ٦ سنين هي مماتتش لكن هي قررت انها مش عايزة تكمل

ف ديه نبذة عن الماسي عشان لو حد اهتم يسال ايه خلاك تكتأب

المهم اني فترة الى٤ سنوات ديه كنت قاعد في البيت مبعملش اي حاجة غير اني باكل وبحشش وبشتغل

من حوالي ٩ شهور قررت لا لازم اخس لاني طخنت جدا وشكلي بقي وحش وصحتي في النازل فقولت هخرج واحاول كده انطلق لقيت نفسي حرفيا مش عارف الناس بتتعامل ازاي مش قادر يكون فيه بيني وبينهم تواصل وخصوصا بتعامل بطبيعتي الي هي كلها لطف وده بيتفهم دايما ان ده راجل اهبل والكلام ده لكن انا حاولت ابطل كتير اكون بشوش ولطيف مقدرتش خصوصا ميتن ام ضميري لو زعلت حد ولا عملتله حاجة حرفيا ضميري بيفشخني حتي لو هو الغلطان والسبب في ده اني وانا صغير طول عمري كنت حزين على امي لانها كانت عايشة دور الاب والام بتشتغل وتطبخ وتغسل وتذاكر وتصرف + كلل ده الله يرحمها يارب كان عندها شلل اطفال اصلا وبتلبس جهاز حديد في رجليها فكنت دايما بتظاهر اني رجلي وجعاني ومبقدرش امشي عشان متحسش انها مختلفة عن باقي الناس ومتزعلش

دلوقتي انا حتي مليش نفس اخرج واتعامل مع اي حد من الي اعرفهم ومعنديش اي طريقة اني اتعرف على ناس جديده لاني اصلا انطوائي غير ان شغلي من البيت ومعنديش اي مكان ممكن يخليني اشوف واعرف ناس جديدة وحتي فكرت اسيب اسكندرية وارجع اعيش في دهب او نويبع لكن لقيت الدنيا هناك اتغيرت والاسعار بقت اوفر اوي ومزنوق دلوقتي في النص لامني عارف اعيش حياتي لوحدي وزهقت من كوني فعلا لوحدي اتعب لوحدي افرح لوحدي وازعل لوحدي ولا مني قادر اتقبل الناس الي حواليا بسبب تصرفاتهم والي بيحصل منهم وحاسس اني شوية وقربت اتجنن خلاص واسف على الاطالة

submitted by /u/Top-Instruction-8254
[link] [comments]

from Egypt: Om el Donia https://www.reddit.com/r/Egypt/comments/14u204x/معدتش_فاهم_اعمل_ايه/